வள்ளலார் ஜோதியில் கலந்த சித்தி வளாகத்தில் திருவறை தரிசனம்; ஆயிரக்கணக்கானோர் பங்கேற்றனர்.

கடலூர் மாவட்டம் வடலூர் அருகே உள்ள மேட்டுக்குப்பம் சித்தி வளாகத்தில் திருவறை தரிசனம் நடைபெற்றது. இங்கு வள்ளலார்  கடந்த 1874 ஆம் ஆண்டு இதே நாளில்  ஒரு அறைக்குள் சென்று  தாழிட்டுக் கொண்டு இறை ஒளியோடு ஜோதியாக கலந்தார். அதனால் இந்த இடம் வள்ளலார் சித்தி பெற்ற இடம் என்று அழைக்கப்படுகிறது.

மேட்டுக்குப்பம் சித்தி வளாகத்தில் ஆண்டு தோறும் அவர் இறை ஒளியோடு கலந்த நாளில் அவர் தாழிட்டு கொண்ட திருவறையை திறந்து ஜோதி தரிசனம் காண்பிக்கப்படும். இதனைக் காண சன்மார்க்க அன்பர்கள் தமிழகத்தின் பல மாவட்டங்களில் இருந்து வருகை தந்து திருவறை தரிசனத்தை கண்டு செல்வது வழக்கம்.

இந்நிலையில் 153 வது சித்திவளாக திருவறை தரிசனத்தை முன்னிட்டு  காலையில் வடலூரில் உள்ள வள்ளலார் சத்திய ஞான சபையில் இருந்து அலங்கரிக்கப்பட்ட பல்லக்கு புறப்பட்டு பார்வதிபுரம் கிராமத்தின் வழியாக ஊர்வலமாக கொண்டுவரப்பட்டு மேட்டுக்குப்பம் சித்தி வளாகத்தை  வந்தடைந்தது.இதன்பின்னர் .வள்ளலார் இறை ஒளியோடு கலந்த திருவறை திறக்கப்பட்டு ஜோதி தரிசனம் காண்பிக்கப்பட்டது.

அப்பொழுது அங்கு கூடியிருந்த ஆயிரக்கணக்கான பக்தர்கள் அருட்பெருஞ்ஜோதி அருட்பெருஞ்ஜோதி தனிப்பெரும் கருணை அருட்பெருஞ்ஜோதி என்ற திருவருட்பாவைப்பாடி திருவறையை கண்டு தரிசித்துச் சென்றனர்.