இலக்கியக் கருத்தரங்கம் கடலூர் மாவட்ட ஆட்சித்தலைவர் டாக்டர்.அ.அருண் தம்புராஜ், தகவல்.

தமிழ் வளர்ச்சித் துறையின் 2021-22ஆம் ஆண்டுக்கான மானியக் கோரிக்கையில் "தமிழ்  அறிஞர்கள், எழுத்தாளர்கள் ஆகியோரின் நினைவிடங்களில் அவர்களின் பிறந்தநாளன்று உள்ளுர் இலக்கிய அமைப்புகள் மூலம் ஆண்டுதோறும் கவியரங்கம், கருத்தரங்கம், இலக்கியக் கூட்டங்கள் 150 இடங்களில் நடத்தப்படும்" என்ற அறிவிப்பு வெளியிடப்பெற்றது. 

அதனடிப்படையில், கடலூர் மாவட்டத்தில் தமிழறிஞர்கள், எழுத்தாளர்களைப் பற்றி இன்றைய இளம்தலைமுறையினர் அறிந்துகொள்வதற்காக ஞானியாரடிகள் எனப்படும் ஸ்ரீலஸ்ரீ சிவசண்முக மெய்ஞ்ஞான சிவாச்சாரிய சுவாமிகள், புதுமைப்பித்தன், புலவர் மா.நன்னன் ஆகியோர்களின் தமிழ் இலக்கியப்பணி, தமிழ்த்தொண்டு, தமிழ்மொழிக்கான பங்களிப்பு ஆகியவற்றை நினைவுகூரும் வகையில் தமிழ் இலக்கியக் கருத்தரங்கம் 07.02.2024 அன்று முற்பகல் 10.00 மணிக்கு கடலூர் கிருஷ்ணசாமி கலை மற்றும் அறிவியில் மேலாண்மையியல் கல்லூரியின் கூட்ட அரங்கில் நடைபெறுகிறது.

முன்னதாக தமிழறிஞர்கள் / எழுத்தாளர்களின் தமிழ் இலக்கியப்பணி, தமிழ்த்தொண்டு. தமிழ்மொழிக்கான பங்களிப்பு ஆகியவற்றை நினைவுகூரும் வகையில் பள்ளி / கல்லூரி மாணவர்களுக்குப் பேச்சுப்போட்டிகள் நடத்தப்பெறவுள்ளன. 01.02.2024 அன்று முற்பகல் 9.30 மணிக்கு பள்ளி மாணவர்களுக்கும் பிற்பகல் 2.30 மணிக்கு கல்லூரி மாணவர்களுக்கும் மஞ்சக்குப்பம், அனைவருக்கும் கல்வி இயக்ககக் கூட்ட அரங்கத்தில் நடைபெற உள்ளன. அப்போட்டிகளில் கலந்துகொண்டு வெற்றிபெறும் பள்ளி/ கல்லூரி மாணவர்களுக்கு மாவட்ட அளவில் முதல் பரிசு ரூ.5000/- இரண்டாம் பரிசு ரூ.3000/- மூன்றாம் பரிசு ரூ.2000/- பாராட்டுச் சான்றிதழ் வழங்கப்பெறும்.

கடலூர் மாவட்டத்திலுள்ள எழுத்தாளர்கள் தமிழறிஞர்கள், எழுத்தாளர்கள், தமிழ் அமைப்புகள், தமிழ் ஆர்வலர்கள், பள்ளி, கல்லூரி மாணவர்கள், பொதுமக்கள் கலந்துகொண்டு தமிழ் இலக்கிய விழாவினைச் சிறப்பிக்குமாறு கடலூர் மாவட்ட ஆட்சியர் அவர்கள் கேட்டுக்கொண்டுள்ளார்.