தமிழக அரசை பாராட்ட மனம் இல்லை என்றாலும்; குறை கூற வேண்டாம் ஆளுநருக்கு காங்கிரஸ் கண்டனம்.

வெளிநாடு சென்று தொழிலதிபர்களை சந்தித்து முதலீடுகளை  ஈர்த்து வந்துள்ள நிலையில் தமிழக முதல்வரை தமிழக ஆளுநர் ஆர்.என். ரவிக்கு பாராட்ட மனமில்லை என்றாலும் குறை கூறாமல் இருப்பது  ஆளுநருக்கு  நல்லது  என்று தமிழ்நாடு காங்கிரஸ் கமிட்டி மாநில பொதுக்குழு உறுப்பினர் ஜெமினி எம். என். ராதா வெளியிட்டுள்ள அறிக்கையில் கூறியுள்ளதாவது:-

உதகையில் நடைபெற்ற பல்கலைக் கழக துணை வேந்தர்கள் மாநாட்டில் ஆளுநர் ஆர்.என். ரவி கலந்து கொண்டார், இந்த மாநாட்டில் பேசிய ஆளுநர் ஆர்.என்.ரவி, "தமிழ்நாட்டுக்கு இணையான முதலீடுகளை ஹரியாணா மாநிலம் ஈர்த்து வருகிறது.

நாம் கேட்பதாலோ, நேரில் சென்று தொழிலதிபர்களுடன் பேசுவதாலோ முதலீடுகள் வராது. முதலீடுகளை ஈர்க்கத் திறமையான மற்றும் பொருத்தமான மனித ஆற்றலை உருவாக்குவதே சிறந்த வழியாக இருக்கும். உலகளாவிய பெரும் தொழில் அமைப்புகளுக்கான சிறந்த சூழலை உருவாக்க வேண்டும்." என்று பேசியுள்ளார்.

சிங்கப்பூர், ஜப்பானுக்கு 9 நாள் அரசுமுறைப் பயணம் மேற்கொண்டுவிட்டுத் திரும்பி இருக்கிறார் தமிழக முதல்வர் மு.க.ஸ்டாலின். இந்தப் பயணத்தில் ஐ.பி நிறுவனம், டைசல் நிறுவனம், ஹோம்ரான் ஹெல்த்கேர் நிறுவனங்கள் உள்ளிட்டவற்றுடன் ரூ.3,233 கோடி மதிப்பிலான புரிந்துணர்வு ஒப்பந்தங்கள் மேற்கொள்ளப்பட்டிருப்பதாக தமிழக முதல்வர் சொல்லி இருக்கிறார்.

முதல்வர் மு.க.ஸ்டாலின் அவர்களின் வெளிநாட்டுப் பயணத்தை இழிவுப் படுத்தும் வகையில் ஆளுநரின் பேச்சும் செயல்பாடும் உள்ளது, ஆளுநருக்கு தமிழக அரசை பாராட்ட மனம் இல்லை என்றாலும் குறை கூறாமல் இருப்பது நல்லது. தமிழக அரசுக்கு  ஆக்கபூர்வமான கருத்து கூறுவதை விடுத்து தமிழக அரசை விமர்சித்து வரும் ஆளுநர்க்கு கடும் கண்டனத்தை ஜெமினி எம்.என்.ராதா தெரிவித்துள்ளார்.